Познатата франшиза Бургер Кинг во септември лани го отвори својот прв ресторан во Македонија, лоциран во новата зграда на скопскиот аеродром. Притоа, Канер Дикичи од турската компанија „ТАБ Фудс“, која ја поседува лиценцата за Бургер Кинг, како и други познати франшизи, во август лани изјави дека до крајот на 2011-та година ќе се отворат уште три ресторани Бургер Кинг во Македонија.
Веќе изминува и првиот месец од 2012-та година, а од трите ресторани нема ни трага ни глас. Се шпекулираа познати локации, меѓу кои беше и улица Македонија, но засега нема ништо од тоа. Моментално нема никакви најави, како целиот проект да е пропаднат во земја.
Мекдоналдс во Македонија почна да прави масовни промоции и попусти во пресрет на доаѓањето на својата конкуренција, но таа сеуште не е пристигната.
Во меѓувреме, се гради нов трговски центар во Карпош, за кој веќе е најавено дека ќе се појават многу брендови и франшизи од сите области, меѓу кои се Старбакс, Карфур, Зара, Бершка… Така што не е лоша претпоставката дека можеби Бургер Кинг ќе сака едниот од трите најавени ресторани да го отвори токму тука, па затоа е одложен стартот. Но, останува да видиме што ќе се случи.
