Уште трговски центри, изникнуваат како печурки, исто како и катните гаражи, и исто како што немаме никаква корист од катните гаражи, освен ако сме луѓе со длабоки џебови, така немаме никаква корист ни од трговски центри.
Мило ми е бидејќи се гради и ќе се отворат нови рабони места, ама колкав процент од населението во Македонија има доволна куповна моќ за да купува од светски брендови ?
Моја претпоставка, околу 15% до 20%, а тоа е поразителна цифра ако се земе во предвид концентрацијата на трговски центри во Скопје.
Јас лично, секогаш кога се отвора нов трговски центар, правам оценка врз тоа колку се достапни работите кои што јас најчесто ги купувам: облека, електроника, хардвер и софтвер.
Облека се продава буквално речиси насекаде, електроника најчесто во трговските центри, бидејќи најчесто (ако не и секогаш) се обезбедени и мали се шансите за кражба, хардвер ретко се наоѓа во трговските центри, еве конкретно во Рамстор има само 2 продавници и двете се крадци невидени, лесно се наоѓаат дилери кои го продаваат истото што го продаваат и овие 2 продавници во Рамстор, оригинални производи се разбира, со гаранција и фискална сметка, 100% легално, а сепак по многу поразумни и поприфатливи цени, во Веро никој не продава хардвер, телефонските и мобилните оператори не се земаат во предвид како продавачи на хардвер бидејќи тие не продаваат од лагер, туку од што ќе им стигне, а софтвер не се продава речиси никаде, ретки се исклучоците како Југотон во ГТЦ кои продаваат видео игрици, по некој дилер во Беверли Хилс и Бисер, а во Рамстор и Веро нема ама баш ништо од софтвер.
А бидејќи јас работам со компјутери, најчесто купувам хардвер и софтвер, барем еднаш неделно, електроника (телевизори, ДВД и видео плеери, озвучувања, фрижидери, бела техника итн.) еднаш на секои 6 месеци, односно 2 пати годишно, а облека еднаш на секои 2 до 3 месеци, односно 4 до 6 пати годишно.
Од моите најчести шопинг потреби, хардвер и софтвер, скопските трговски центри, со исклучок на ГТЦ, се вистинско разочарување, а овој Скопје Сити Мол, колкав сака нека биде, слушнав дека ќе бил најголем не само во Македонија, туку и на целиот Балкански Полуостров, но колку ќе ги задоволува моите потреби, земајќи ги во предвид и цените, толку и ќе купувам во истиот.